Úttekt: Hvað græða liðin á að reka stjórann?

Martin Jol og Sammy Lee þykja líklegir kandídatar í að verða fyrstu knattspyrnustjórarnir til þess að taka pokann sinn á þessu tímabili. Vísir rifjar hér upp hverju það hefur skilað liðum á síðustu árum að reka knattspyrnustjórann svo snemma á leiktíðinni.

Tímabil: 2006/2007

Fyrstur að taka pokann: Ian Dowie, rekinn frá Charlton þann 13. nóvember.

Þrátt fyrir að hafa gefið Alan Curbishley 15 ár, ákvað stjórn Charlton að gefa Ian Dowie aðeins 15 leiki með félaginu. Eftir að fjölmiðlar höfðu birt nokkra fréttir þess efnis að Dowie hefði lent í útistöðum við leikmenn ákvað stjórnin að fá Les Reed til að taka við klúbbnum.

Charlton var þá neðst eftir 15 leiki. Þrír þeirra voru reyndar gegn Man Utd, Chelsea og Arsenal.

Hvað gerðist svo: Charlton féll um deild.

Tímabil: 2005/2006

Fyrstur að taka pokann: Alain Perrin, rekinn frá Portsmouth þann 24. nóvember.

Bjargvætturinn frá tímbilinu áður fékk opinbera stuðningsyfirlýsingu frá Milan Madaric, eiganda Portsmouth, þann 23. nóvember. Daginn eftir var hann rekinn. Portsmouth var þá einu sæti frá falli með fjóra sigra.

Harry Redknapp tók við liðinu og um jólin var Portsmouth komið í botnsætið.

Hvað gerðist svo: Portsmouth hélt sér uppi naumlega, tveim stigum frá falli. Árinu áður hafði Perrin haldið klúbbnum uppi, einnig naumlega en þó sex stigum frá fallsæti sem er fjórum stigum betra en Redknapp.

Tímabil: 2004/2005

Fyrstur að taka pokann: Paul Sturrock, rekinn frá Southampton þann 23. ágúst.

Sturrock fékk Southampton starfið í mars og var rekinn fimm mánuðum síðar, aðeins tveim leikjum eftir að tímabilið hófst. Og annar af þeim vannst, 3-2 sigur á Blackburn.

Það þótti samt ekki nógu gott og Steve Wigley fékk því starfið. Hann þraukaði ekki í nema þrjá mánuði og var rekinn í nóvember. Þá var Harry Redknapp fenginn til liðsins frá erkifjendunum í Portsmouth við litla hrifningu stuðningsmanna.

Hvað gerðist svo: Southampton féll um deild.

Tímabil: 2003/2004

Fyrstur að taka pokann: Glenn Hoddle, rekinn frá Tottenham þann 29. september.

Hoddle var rekinn eftir að Tottenham hafði aðeins unnið einu sinni í sjö leikjum. Hoddle bar því við að aðstoðarmaður hans David Pleat hefði skipt sér of mikið af.

Pleat þessi fékk svo starfið hans Hoddle og hélt því út tímabilið.

Hvað gerðist: Tottenham féll um fjögur sæti frá árinu tímabilinu áður og endaði í 14. sæti

Tímabil: 2002/2003

Fyrstur að taka pokann: Peter Reid, rekinn frá Sunderland þann 7. október.

Þrátt fyrir að hafa verið sjö ár við stjórnvölinn og komið Sunderland í úrvalsdeild og það í sjöunda sætið, tók það stjórnina aðeins níu leiki til að missa þolinmæðina á Peter Reid.

Howard Wilkinson var fenginn til liðsins en reyndist beinlínis verri en enginn, sá var rekinn í mars. Þá tók við Mick McCarthy.

Hvað gerðist: Sunderland féll með 19 stig.