Beckham flýgur 18 þúsund kílómetra á sex dögum

Það er ekki tekið út með sældinni að vera David Beckham. Ákvörðun hans um að spila áfram með enska landsliðinu eftir að hann fluttist til Bandaríkjanna er þegar farin að taka sinn toll. Þetta sést best á ferðaáætlun hans þessa vikuna sem Vísir er búinn að taka saman.

David Beckham býr í Los Angeles og spilar með Galaxy liðinu þar. Á laugardaginn flaug hann með liðinu frá LA til New York þar sem Galaxy átti leik við Red Bull liðið í bikarkeppninni.

Flugið frá LA til New York er 3932 kílómetrar.

Eftir leikinn, sem fór 5-4 fyrir Red Bull, svaf Beckham á hóteli í New York. Daginn eftir, sunnudag, hoppaði hann í flugvél sem flutti hann til London þar sem Beckham fór til æfinga með enska landsliðinu.

Flugið frá New York til London 5532 kílómetrar.

Beckham mun í kvöld leika með enska landsliðinu gegn því þýska í vináttuleik í London. En strax eftir leikinn þarf hann að hoppa upp í vél til LA þar sem Galaxy á leik annað kvöld.

Flugið frá London til LA er 8611 kílómetrar.

Þetta þýðir að fyrir þrjá leiki þarf David Beckham að ferðast í gegn um fjögur tímabelti á sex dögum, samtals 18075 kílómetra.

Það jafngildir því að hann hafi ferðast hringinn í kring um jörðina einum og hálf sinnum.

Það er svo sannarlega ekkert grín að vera David Beckham.