Jol fær 520 milljónir ef hann verður rekinn

Þrátt fyrir að forráðamenn Tottenham geri hvað þeir geta til að draga fjöður yfir þá staðreynd að þeir vilja losna við hollenska knattspyrnustjórann Martin Jol þá hafa þeir nú gengið frá drögum að starfslokasamningi Jol ef hann verður rekinn.

Sá samningur hljóðar upp á greiðslu sem nemur fjórum milljónum punda, um 520 milljónum íslenskra króna, en staða Jol hjá Tottenham er orðin erfið eftir að hann lenti upp á kant við stjórnarformanninn David Levy og Damien Comolli, yfirmann knattspyrnumála.

Forráðamenn Tottenham hafa reynt mikið að fá hinn frábæra þjálfara Sevilla, Juande Ramos, til liðsins en Sevilla vill ekki sleppa honum. Þá hefur Mark Hughes, knattspyrnustjóri Blackburn, einnig verið nefndur til sögunnar.

Jol hefur stýrt Tottenham í fimmta sæti ensku úrvalsdeildarinnar undanfarin tvö ár en slæm byrjun á þessu tímabili hefur gert Jol erfitt fyrir. Liðið er með þrjú stig eftir þrjá leiki þrátt fyrir að hafa eytt um fimm milljörðum í leikmenn í sumar.