Richards hefur ekki skrifað undir

Varnarmaðurinn Micah Richards hefur enn ekki skrifað undir samning við Manchester City. Þessi bráðefnilegi varnarmaður sem er fæddur 1988 fékk nýjan samning í hendurnar í síðasta mánuði en hefur enn ekki skrifað nafn sitt undir hann.

Richards er talinn einn efnilegasti leikmaðurinn í Evrópufótboltanum en hann átti hreint frábæran leik um síðustu helgi þegar City vann granna sína í United. Hann er þegar kominn í enska landsliðshópinn.

Mörg af stórliðum Evrópu, þar á meðal fjögur efstu lið ensku úrvalsdeildarinnar, hafa áhuga á þessum nítján ára leikmanni. Richards vakti athygli í hægri bakverðinum hjá City á síðasta tímabili en hefur spilað í hjarta varnarinnar á þessu tímabili.