Johnson ekki með gegn Þýskalandi

Andy Johnson, sóknarmaður Everton, verður ekki með enska landsliðinu í vináttulandsleiknum gegn Þýskalandi á morgun. Hann er meiddur á hné og dregur sig því út úr hópnum. Þetta er enn eitt áfallið fyrir enska liðið en margir leikmenn geta ekki spilað vegna meiðsla.

Steven Gerrard, fyrirliði Liverpool, hafði áður dregið sig úr hópnum og einnig þeir Owen Hargreaws, Sol Campbell og Darren Bent. Steve McClaren hefur því haft nóg að gera síðan hann tilkynnti 28 manna hóp fyrir þennan leik.

Auk fyrrnefndra leikmanna eru sóknarmennirnir Wayne Rooney og Peter Crouch fjarri góðu gamni. Í næsta mánuði á England leiki gegn Ísrael og Rússlandi í undankeppni Evrópumótsins en leikurinn gegn Þýskalandi er hluti af undirbúningi enska liðsins fyrir þá leiki.