Ronaldo: Nani má vera stoltur

Menn hafa misjafnar skoðanir á byrjun tímabilsins hjá portúgalska leikmanninum Nani og hefur hann fengið talsverða gagnrýni. Cristiano Ronaldo, liðsfélagi hans hjá Manchester United, segir þó að landi sinn geti verið mjög stoltur af því hvernig hann fer af stað með Englandsmeisturunum.

„Hann er í góðu formi. Hann hefur verið að gera flotta hluti, fengið mikið að spila og er fullur sjálfstrausts. Ég vona að hann haldi áfram á sömu braut því það hjálpar liðinu mikið," sagði Ronaldo.

Fagnaðarlæti Nani þegar hann skorar eru fræg en Sir Alex Ferguson, knattspyrnustjóri United, hefur bannað honum að taka þau vegna meiðslahættu. „Persónulega væri ég til í að sjá hann fagna svona áfram en þetta mál er milli hans og stjórans," sagði Ronaldo.

„Byrjunun á tímabilinu hefur vissulega verið mikil vonbrigði. Það er þó mikilvægast að halda áfram okkar vinnu. Í þessu móti er ekki spurt hvernig maður byrjar heldur hvernig maður endar og ég er sannfærður um að þetta fari að falla með okkur," sagði Cristiano Ronaldo.