Er Anelka á förum?

Nicolas Anelka gæti yfirgefið herbúðir Bolton áður en félagaskiptaglugganum lokar. Þessi franski sóknarmaður hefur verið orðaður við Manchester liðin City og United eftir mjög slæma byrjun Bolton á tímabilinu. Einnig fylgist Lyon í heimalandi hans grannt með gangi mála.

„Mér líður vel hjá Bolton en peningarnir sem félagið fengi fyrir mig gætu komið að góðum notum," sagði Anelka. Einnig er verið að tala um að El Hadji Diouf gæti verið á förum frá félaginu en hann vill fara til stærra liðs.

Bolton hefur byrjað tímabilið hörmulega undir stjórn Sammy Lee og tapað öllum þremur leikjum sínum til þessa.