Ekkert vandamál milli Jol og Berbatov

Búlgarski sóknarmaðurinn Dimitar Berbatov segir að sögusagnir um slæmt samband hans við Martin Jol, knattspyrnustjóra sinn hjá Tottenham, séu ekki réttar. Talað hefur verið um að Jol vilji losna við Berbatov eftir að leikmaðurinn brást ókvæða við því að vera skipt af velli gegn Sundarland.

Emil Dantchev, umboðsmaður búlgarska markahróksins, segir að ekkert vandamál sé milli Jol og Berbatov. Byrjun Tottenham á tímabilinu er talsvert undir þeim væntingum sem gerðar voru en eftir að hafa tapað tveimur fyrstu leikjum sínum landaði liðið sigri gegn Derby 4-0 á laugardag.

Hluti af stjórn Tottenham virðist ekki hafa trú á því að Jol sé rétti maðurinn til að koma liðinu í hóp fremstu liða Englands. Fjölmiðlar á Bretlandseyjum hafa greint frá því að talað hafi verið við Juan Ramos, þjálfara Sevilla á Spáni, um að taka við liðinu. Þeim fréttum hefur reyndar verið neitað af umboðsmanni Ramos.

Berbatov var keyptur fyrir ellefu milljónir punda frá þýska liðinu Bayer Leverkusen fyrir síðasta leiktímabil. Hann skoraði 22 mörk á sínu fyrsta tímabili á White Hart Lane.