Eigandi Newcastle kannast ekki við kauptilboð frá Pálma Haraldssyni

Talsmaður eiganda enska úrvalsdeildarliðsins Newcastle segir að aldrei hafi staðið til að selja knattspyrnuliðið. Hann segir engar samningaviðræður hafa átt sér stað við Pálma Haraldsson, athafnamann, og að eigendum hafi ekki borist neitt tilboð í félagið.

Þetta kemur fram á vefútgáfu enska blaðsins Evening Chronicle. Þar kemur einnig fram að Mike Ashley, eigandi Newcastle, sé orðinn langþreyttur á þeim orðrómi að hann hyggist selja félagið. Talsmaður Ashley segir í viðtalið við blaðið að allar sögusagnir um mögulega sölu á liðinu séu úr lausu lofti gripnar.

„Við höfum ekki fengið neitt tilboð í félagið og það hefur enginn haft samband við okkur um mögulega kaup," er haft eftir talsmanni Ashley.

Í viðtali við Vísi morgun sagðist Pálmi Haraldsson ekki ætla að kaupa félagið.