Mál Heinze leysist í fyrsta lagi á morgun

Mál argentíska varnarmannsins sterka, Gabriel Heinze, mun ekki leysast fyrr en í fyrsta lagi á morgun. Heinze vill ólmur komast frá Manchester United til Liverpool en það vilja forráðamenn United ekki fallast á. Heinze flutti mál sitt frammi fyrir stjórn ensku úrvalsdeildarinnar í dag þar sem hann sagði að sér hafi verið lofað að hann mætti fara ef tilboð upp á 6,8 milljónir punda bærist í hann.

Alex Ferguson og David Gill sátu fundinn fyrir hönd United og segja þeir að Heinze megi yfirgefa félagið fyrir umrædda upphæð, en bara til félags sem þeir samþykkja. Heinze vill meina að hann eigi að fá að ákveða eigin framtíð, sem myndi þýða að hann færi til Liverpool.

Talsmaður úrvalsdeildarinnar staðfesti í dag að ákvörðun í málinu væri væntanleg á morgun.