Alan sáttur við stigin þrjú

Alan Curbishley, knattspyrnustjóri West Ham, sagðist þokkalega sáttur með leik sinn manna í kvöld en liðið vann sinn fyrsta sigur í deildinni í ár með því að bera sigurorð af Birmingham. Curbishley sagði í lok leiks að sínir menn hefðu verið töluvert óöryggir til að byrja með.

„En þegar leið á leikinn fór þetta að ganga betur og við hefðu getað sett tvö eða þrjú mörk í viðbót," sagði stjórinn við blaðamenn. Hann sagði að vítið sem dæmt var hafi verið fyllilega réttlætanlegt, en markvörður Birmingham tæklaði Bellamy harkalega.

„Þegar markmaður kemur svona út á móti manni þá verður hann að ná boltanum og honum tókst það ekki," sagði þjálfarinn. „Mér fannst líka að við hefðum átt að fá víti þegar brotið var á Dyer," sagði Curbishley og vísaði til þess þegar Stephen Kelly braut klaufalega á Kieron Dyer í byrjun leiksins.