Joorabchian vill láta skoða Tevez-málið upp á nýtt

Íranski athafnamaðurinn Kia Joorabchian, sem er umboðsmaður og eigandi Carlosar Tevez, vill láta skoða mál skjólstæðings síns ofan í kjölinn á nýjan leik þar sem hann segir margt óskýrt enn. Joorabchian segist vera tilbúinn til að borga allan kostnað sjálfur af nýrri rannsókn.

"Það er búið að draga mig, leikmanninn minn, West Ham og ensku úrvalsdeilina á asnaeyrunum í gegnum allt þetta mál," segir Joorabchian á vef BBC og gagnrýnir sérstaklega Richard Scudamore, framkvæmdastjóra Ensku úrvalsdeildarinnar.

Tevez-málið er búi að vera í gangi í marga mánuði og héldu flestir að það væri til lykta leitt þegar Carlos Tevez varð leikmaður Manchester United fyrir rúmri viku. Svo er þó ekki og líklegt að forráðamenn Sheffield United, sem féll úr úrvalsdeildinni, gleðjast yfir þessu framtaki Joorabchian. Þeir ætla að krefjast skaðabóta af West Ham og halda því fram að félagið hefði átt að missa stig til vibótar 700 milljóna króna sektinni sem West Ham fékk þegar dómur í málinu var kveðinn upp.