Torres hlakkar til leiksins gegn Chelsea

Spænski framherjinn Fernando Torres hjá Liverpool getur ekki beðið eftir því að mæta Chelsea en liðin mætast í ensku úrvalsdeildinni á morgun. Torres þykir hafa byrjað vel með Liverpool eftir að hann var keyptur frá Atletico Madrid fyrir 26 milljónir punda í sumar og segir leikinn gegn Chelsea á Anfield vera þann sem hann hafi hlakkað hvað mest til þegar hann skrifaði undir samning við Liverpool.

"Þetta verður eins og meistaradeildarleikur á Anfield og það að mæta Chelsea verður ólýsanlegt," segir Torres sem á enn eftir að opna markareikning sinn fyrir Liverpool í úrvalsdeildinni.

"Mér finnst ég ekki vera undir neinni pressu að skora. Það er mikilvægast núna að verða hluti af liðinu og læra inn á leikstíl liðsins. Auðvitað vonast ég til þess að skora mark fljótlega en ég einbeiti mér að því að gera það sem þjálfarinn biður mig um," segir Torres.