Glaumgosi kaupir QPR

Ítalski glaumgosinn Flavio Briatore mun ganga frá kaupum á hinu fornfræga knattapyrnuliði Queens Park Rangers á mánudaginn. Briatore mun greiða 22 milljónir punda fyrir klúbbinn og bjarga QPR frá yfirvofandi gjaldþroti.

Briatore er þekktur athafnamaður sem þekktastur er fyrir að byggja upp Benetton veldið og þykir afar lunkinn kaupsýslumaður. Markmið hans er að koma QPR aftur upp í úrvalsdeildina en félagið spilar nú í 1. deild.

Briatore er yfirmaður Renault-liðsins í Formúlu 1 en hann er hvað þekktastur fyrir að hafa stofnað Benetton-liðið og gefið Michael Schumacher tækifæri í Formúlunni. Hann virðist líka hafa auga fyrir fögrum konum því meðal þeirra sem hann hefur átt í sambandi við eru ofurfyrirsæturnar Naomi Campbell, Heidi Klum og Adriana Volpe.