“Ég ætlaði ekki að fiska Ronaldo útaf

Leikmaðurinn sem Cristiano Ronaldo skallaði í gærkvöld, og fékk rautt spjald fyrir, hefur tjáð sig um atvikið. Richard Hughes segir það ekki hafa verið ætlun sína að fiska Ronaldo út af eins og Alex Ferguson gaf í skyn eftir leikinn í gær.

"Eins og venjulega var eitthvað um ýtingar inn í vítateignum fyrir hornið," segir Hughes í viðtali við heimasíðu Portsmouth.

"Ronaldo ýtti mér fyrst til þess að fá meira pláss og ég þurfti því að koma mér eins nálægt honum og ég gat. Fyrst reyndi hann að sparka í mig en hann hitti ekki. Svo skallaði hann mig í andlitið. Þetta var beint fyrir framan dómarann sem ákvað að réttast væri að vísa Ronaldo útaf. En ég reyndi ekki að fiska hann eins og Ferguson hefur sagt. Viðbrögð mín strax eftir þetta sýna það held ég."

Ronaldo á yfir höfði sér þriggja leikja bann fyrir uppákomuna.