Abramovich sagði nei

Roman Abramovich, eigandi Chelsea, hefur neitað að samþykkja kaup félagsins á brasilíska bakverðinum Daniel Alves frá Sevilla fyrir 24,5 milljónir punda. Hann hefur sent Peter Kenyon, yfirmanni knattspyrnumála hjá félaginu þau skilaboð að drífa sig aftur til Spánar og kaupa Alves fyrir lægra verð.

Þetta er mikið áfall fyrir bæði Kenyon og Jose Mourinho, knattpsyrnustjóra Chelsea, sem hefur eltst við Alves í allt sumar. Kenyon fékk þá skilaboð frá Abramovich að kaupverðið væri alltof hátt.

Það er þó enn von. Umboðsmaður Alvesar telur að enn sé hægt að klára kaupin. "Alves hefur sagt að hann sé harðákveðinn í því að fara til Chelsea og hefur sent forráðamönnum Sevilla þau skilaboð að klára þetta mál," segir umboðsmaðurinn Geronimo Suarez.