Luque að yfirgefa Newcastle

Spánverjinn Albert Luque virðist staðráðinn í að enda árs langa martröð sína hjá Newcastle. Tvö lið vilja fá hann að láni út næsta tímabil. Luque var keyptur til Newcastle í fyrra á 9.5 milljónir punda frá Deportiva La Coruna en hann hefur átt í miklum erfiðleikum á Englandi og ekki fest sig í sessi hjá Newcastle.

Liðin tvö sem eru á eftir Luque eru spænska liðið Levante og hollenska liðið Feyenoord. Faðir leikmannsins, sem jafnframt er umboðsmaður hans, segir að ekki líði á löngu þar til málið leysist og að Luque komist frá Newcastle.

Ástæðan fyrir því að Luque er nú æstur í að komast frá Newcastle er sú að hann eygir ekki mikla möguleika á að brjóta sér leið inn í byrjunarliðið hjá Sam Allardyce.

Allardyce hefur verið að styrkja sóknarleik Newcastle og fengið til þess þá Alan Smith og Mark Viduka en auk þeirra eru Obafemi Martins og Michael Owen hjá liðinu.