Gallas verður fyrirliði Arsenal

Franski varnarmaðurinn William Gallas verður næsti fyrirliði Arsenal, en þetta tilkynnti félagið í dag. Arsene Wenger knattspyrnustjóri Arsenal segist hafa valið Gallas vegna reynslunnar sem hann býr yfir, en Gilberto og Kolo Toure verða varafyrirliðar.

„Mér finnst að það sé alltaf best að miðverðir beri fyrirliðabandið og Gallas hefur mestu reynslunna í þeirri stöðu," segir Wenger á heimasíðu félagsins. „Gilberto hefur þó alltaf staðið sig vel sem fyrirliði og Toure hefur einnig mikla leiðtogahæfileika."

Gallas tekur við fyrirliðabandinu af framherjanum Thierry Henry sem var seldur til Barcelona fyrr í sumar.