Shay Given missir af byrjun tímabilsins

Shay Given, markvörður Newcastle, mun missa af byrjun ensku úrvalsdeildarinnar vegna meiðsla. Given meiddist í vináttuleik við Sampdoria um síðustu helgi en ekki er enn vitað hversu slæm meiðslin eru, en talið er að meiðslin séu svipuð og hann átti í erfiðleikum með á síðustu leiktíð.

„Hann er farinn til London í skoðun hjá sérfræðingum til að sjá hversu slæm meiðslin eru," sagði Sam Allardyce, knattspyrnustjóri Newcastle. „Meiðslin líta samt ekki út fyrir að vera alvarleg. Í augnablikinu teljum við að hann verði bara frá í tvær vikur."

Framherjinn Michael Owen mun einnig missa af byrjun tímabilsins vegna meiðsla á læri.