Keane keypti dýrasta markvörð Bretlands

Skotinn Craig Gordon varð í gær dýrasti markmaður Bretlandseyja og þriðji dýrasti markmaður í heimi þegar hann gekk til liðs við Sunderland frá Hearts í Skotlandi.

Skoski landsliðsmarkmaðurinn Craig Gordon mun í dag ganga frá félagskiptum frá skoska liðinu Hearts til Sunderland sem leikur í ensku úrvalsdeildinni í knattspyrnu. Það væri svo sem ekki í frásögur færandi nema hvað verðmiðinn á þessum 24 ára markverði er óvenju hár þegar um markvörð er að ræða, en Sunderland greiðir Hearts, 9 milljónir punda fyrir hann, eða um einn komma tvo milljarða króna.

Það gerir Gordon að dýrasta markverðinum í sögu enskrar knattspyrnu og þriðja dýrasta markverði í heimi. Gamla metið á Englandi átti Man Utd sem greiddi Mónakó 7.8 milljónir punda fyrir Fabien Barthez árið 2000. Dýrasti markvörður í heimi er þó ennþá Gianluigi Buffon sem Juventus á Ítalíu greiddi Róma 30 milljónir punda fyrir árið 2001.

Til samanburðar má geta að Chelsea greiddi franska liðinu Rennes aðeins 7 milljónir punda fyrir Peter Cjekk, árið 2004 en Chekk er því núna orðinn þriðji dýrasti markvörðurinn á Bretlandi.

Knattspyrnustjóri Sunderland er Roy Keane, fyrrverandi fyrirliði Man Utd. Hann tók við liðinu í fallbaráttu ensku fyrstu deildarinnar í fyrra og stýrði liðinu til sigurs í deildinni og tryggði liðinu þar af leiðandi sæti í úrvalsdeildinni.