Heinze ákveðinn í að komast frá United - Fer fyrir úrskurðarnefnd

Argentínski bakvörðurinn Gabriel Heinze hefur farið fram á það að hann fái að flytja mál sitt frammi fyrir úrskurðarnefnd ensku úrvalsdeildarinnar, en Heinze vill komast frá Manchester United og ganga til liðs við Liverpool.

Heinze heldur því fram að hann hafi bréf í fórum sínum, undirritað af forráðamönnum United, sem leyfir honum að yfirgefa félagið ef að tilboð upp á 6,8 milljónir punda berist í hann. Forráðamenn United halda því þó fram að þeir hafi gert varnarmanninum það ljóst, bæði með bréfi og munnlega, að hann verði ekki seldur til helstu andstæðinganna í úrvalsdeildinni.

Talið er að málið verði tekið fyrir af úrskurðarnefndinni í næstu viku.