Gallas vill verða næsti fyrirliði Arsenal

Franski varnarmaðurinn William Gallas segist vilja verða næsti fyrirliði Arsenal. Arsene Wenger, framkvæmdastjóri klúbbsins, hefur nefnt Gallas sem einn af þeim þremur sem koma til greina til að taka við fyrirliðabandinu frá Thierry Henry sem gekk til liðs við Barcelona fyrr í sumar, en Gilberto Silva og Kolo Toure koma einnig til greina.

„Ég er 30 ára og ég vil gegna meiri ábyrgð bæði fyrir Arsenal og landsliðið," sagði Gallas við L´Equipe. „Ég er hrifinn af þeirri hugmynd að verða leiðtogi og leiðbeina yngri leikmönnum. Ef ég verð valinn verð ég mjög stoltur."