Aston Villa fær varnarmann frá Bandaríkjunum

Aston Villa hefur tryggt sér þjónustu bandaríska varnarmannsins Eric Lichaj. Lichaj er 18 ára gamall og spilaði með háskólanum í North Carolina. Leikmaðurinn heillaði Martin O´Neill, framkvæmdastjóra Aston Villa, upp úr skónum þegar hann lék með U17 og U20 ára liðum Bandaríkjanna, og skrifaði í framhaldi af því undir tveggja ára samning.

Lichaj er fótbrotinn eins og er og mun því ekkert leika knattspyrnu fyrr en í fyrsta lagi september. „Eric hefur skrifað undir tveggja ára samning með möguleika á framlengingu," sagði Steve Kelly, umboðsmaður Lichaj.

„Hann meiddist áður en hann skrifaði undir samninginn, en þeir sáu hæfileika hans áður en það gerðist. Hann mun byrja á að spila fyrir varaliðið en takmark hans er að komast sem fyrst í aðalliðið.“