Martins: Ég er ekki að fara neitt

Framherjinn Obafemi Martins segist vera mjög ánægður hjá Newcastle og að hann sé ekki á leiðinni frá félaginu. Arsenal hefur mikinn áhuga á Martins og Arsene Wenger hefur greint frá því að hann hafi mikið álit á leikmanninum, en Martins skoraði 17 mörk á sínu fyrsta tímabili fyrir Newcastle.

Mikil barátta verður um sæti í framlínu liðsins á næsta tímabili þar sem Michael Owen, Mark Viduka, Albert Luque og Andy Carroll munu berjast um sæti auk Martins. „Ég er ekki að fara neitt. Ég er mjög ánægður hérna. Ég er enn leikmaður Newcastle," sagði Martins við vefsíðu Newcastle.

„Það er nauðsynlegt að hafa samkeppni. Við þurfum að spila marga leiki svo að allir þurfa að standa saman," bætti Martins við.