Mourinho lofar að vera góður við Beckham

Jose Mourinho segist ólmur vilja að David Beckham fái að taka einhvern þátt í æfingaleik Chelsea og LA Galaxy í dag, þar sem Chelsea leikur sinn síðasta leik á æfingaferðalagi um Norður-Ameríku. Beckham er mjög tæpur fyrir leikinn vegna ökklameiðsla.

"Ef Beckham nær að spila 10 mínútur munum við verða góðir við hann og spörkum ekkert í hann," sagði Mourinho og glotti. "Ef hann treystir sér til að spila síðustu 10 mínúturnar í leiknum og við erum í góðri stöðu - má vel vera að við gefum honum aukaspyrnu og leyfum honum að skora. Það er fullt af svona dæmum í knattspyrnusögunni og bæði Pele og Eusebio lentu í svipaðri aðstöðu.

Ef Beckham er alvarlega meiddur á hann auðvitað ekkert að taka þátt í þessum leik, en ef það hefur ekki alvarlegar afleiðingar í för með sér - er það allt í lagi. Ég held að Bandaríkjamennirnir þurfi á þessum leik að halda og ef hann getur ekki tekið þátt - ættu menn að gera eitthvað sérstakt fyrir hann fyrir leikinn," sagði Mourinho.