Súnní múslimar stofna pólitískt bandalag

Sjö helstu uppreisnarhreyfingar Súnni múslima, sem berjast gegn Bandaríkjamönnum í Írak, hafa ákveðið að stofna pólitískt bandalag.

Þessar uppreisnarhreyfingar eru ábyrgar fyrir þúsundum árása á vopnaðar sveitir Bandaríkjamanna og Íraka, Leiðtogar þeirra fullyrða að vopnaðri andspyrnu verði haldið áfram þangað til að allar erlendar hersveitir verði horfnar frá Írak.

Öll helstu samtök Súnní múslima munu eiga aðild að bandalaginu, fyrir utan al-Qaida og Ba'athista, að sögn leiðtoga uppreisnarhreyfinganna. Þeir segja að aðildarhreyfingar hafi samþykkt meginefni í pólitískri stefnuyfirlýsingu, sem felist í skuldbindingu um að frelsa Írak undan öllum erlendum hersveitum, að hafna allri samvinnu við félög sem hafi verið stofnuð eftir innrásina og yfirlýsingu um að allar ákvarðanir og samþykktir sem hafi verið gerðar af Bandaríkjunum og írösku stjórninni sé einskis virði.

Leiðtogar samtakanna hyggjast halda þing á næstunni til að stofna samtökin formlega og biðja stjórnvöld annarra ríkja, þar á meðal arabísk stjórnvöld og Sameinuðu þjóðirnar um aðstoð við að mynda pólitísk tengsl utan Íraks.

Með stofnun pólitísks bandalags eru uppreisnarhreyfingarnar að gjörbreyta stefnu sinni því hingað til hafa þær einungis viljað senda frá sér stuttorðar yfirlýsingar á Netinu og í gegnum arabíska fjölmiðla.