Skólausum Celtic-mönnum þótti heitt í Denver

Skotlandsmeistarar Glasgow Celtic eru nú í æfingaferð í bandaríkjunum þar sem þeir spila tvo æfingaleiki við stjörnulið MLS-deildarinnar og Chicago Fire. Skotarnir urðu að bíða í hátt í klukkutíma eftir sinni fyrstu æfingu því skór leikmanna týndust á flugvellinum í Denver.

"Lendið þið Bandaríkjamenn mikið í þessu," sagði Scott Brown, leikmaður Celtic, og skaut á blaðamenn sem ræddu við hann á fyrstu æfingu liðsins. Hitinn í Colorado hefur verið óbærilegur undanfarna daga og það er eitthvað sem lærisveinar Gordon Strachan eiga ekki að venjast.

"Það vottar ekki fyrir sól í Evrópu á þessum árstíma. Við erum búnir að þvælast um alla Evrópu og það sést ekki til sólar - og svo vaknar maður hérna að hitinn er að rokka frá 30 og upp í 40 gráður," sagði hinn rauðhærði knattspyrnustjóri Celtic.