Skiptar skoðanir um Beckham í Los Angeles

Flestir íbúar Los Angeles fagna því að David Beckham sé á leið til LA Galaxy í MLS deildinni og telja það knattspyrnunni í Bandaríkjunum til framdráttar. Helmingur íbúa í Los Angeles er þó af spænskumælandi uppruna og sumir þeirra eru ekkert of hrifnir af komu goðsins.

Alexei Lalas, forseti LA Galaxy, segir að koma David Beckham muni koma knattspyrnunni betur á kortið í Bandaríkjunum og að aðrir leikmenn í deildinni muni geta notið góðs af því hve þekktur Beckham er á heimsvísu. "David höfðar til allra hópa og ég held að það sé sama hvort þú spyrð innflytjanda frá Mið-Ameríku eða húsmóður frá Orange County - allir vita hver Beckham er. Ef við hefðum fengið knattspyrnustjörnu frá Mið- eða Suður-Ameríku, er alls ekki víst að allir vissu hver hann væri."

Fréttamenn ræddu við nokkra stuðningsmenn Galaxy eftir deildarleik liðsisn á dögunum og spurðu þá hvernig þeim litist á komu Beckham til LA. Diego Sologuren er 25 ára gamall stuðningsmaður LA Galaxy og er fæddur í Perú. Hann segir að Beckham muni opna dyrnar fyrir fleiri alþjóðlegar stjörnur að koma til Bandaríkjanna.

"Beckham er frábær persónuleiki og það er mikilvægt að fá svoleiðis menn til félagsins. Í Suður-Ameríku er sagt að ef þú farir og spilir í MLS-deildinni - muni heimurinn ekki taka eftir því sem þú ert að gera þó þú standir þig vel. Þetta mun breytast með tilkomu David Beckham," sagði Sologueren.

Ronaldo Cifuentes frá Gvatemala er hinsvegar ekki jafn hrifinn af komu goðsins og telur að það muni hafa neikvæðar afleiðingar í för með sér fyrir hinn almenna áhorfanda í MLS-deildinni.

"Miðaverð á leiki, bílastæði og meira að segja verðið á pylsunum mun rjúka upp eftir að Beckham kemur hingað," sagði Cifuentes sem er 59 ára gamall og hefur verið ársmiðahafi hjá LA Galaxy í 12 ár. "Það er fullt af Suður- og Mið-Ameríkumönnum sem eru alveg eins góðir og hann sem kosta miklu minna. Beckham er ekkert annað en snoppufríður."

Þá eru stuðningsmenn eins og hin 33 ára gamla Sonia Interiano sem flutti til Bandaríkjanna fyrir 20 árum síðan. "Hann er svo kynþokkafullur - hann er algjört æði. Hann er eina ástæða þess að við keyptum okkur ársmiða með Galaxy," sagði hún.