Appelsínur á bílinn

Hægt er að nota ávaxtasykur sem vistvænan orkugjafa til þess að knýja bíla áfram. Þetta segja bandarískir vísindamenn og benda á að slíkt eldsneyti sé mun orkuríkara en etanól. Í grein í tímaritinu Nature kemur enn fremur fram að eldsneyti úr frúktósa gufi ekki eins hratt upp og etanól og þá kviknar ekki í því eins auðveldlega.

Þá hafa breskir vísindamenn komist að því að hægt er að búa til lífrænt eldsneyti úr alls kyns rusli eins og plastpokum og einnig úr viði og illgresi. Telja breskir vísindamenn að innan sex ára verði þriðjungur díseleldsneytis unninn með þessum hætti.

Gagnrýnendur benda hins vegar á að með því að nota matvæli eins og korn eða ávexti til eldsneytisframleiðslu geti matarverð hækkað umtalsvert.