Royal og Sarkozy tókust á í beinni

Forsetaframbjóðendurnir í Frakklandi, þau Segolene Royal og Nicolas Sarkozy tókust á í kappræðum í kvöld sem talið er að um 20 milljón manns hafi horft á. Þau ræddu meðal annars um atvinnu- og efnahagsmál og lögreglumál. Kappræðurnar voru sendar út á tveimur stærstu sjónvarpsstöðvum Frakklands og fyrir þáttinn var talið að hann gæti haft úrslitaáhrif á þá kjósendur sem enn eiga eftir að gera upp hug sinn.

Royal gagnrýndi Sarkozy fyrir frammistöðu hans í ríkisstjórninni og sagði hann hafa staðið sig illa í málefnum sem varða glæpi og öryggi borgaranna, en í þeim málum hefur Sarkozy einmitt verið talinn á heimavelli hingað til.

Innanríkisráðherrann fyrrverandi varðist ásökunum Royal og sagði tölurnar tala sínu máli, dregið hefði úr glæpum í ráðherratíð hans. Umbætur í opinbera geiranum voru einnig ræddar í kappræðunum auk atvinnumála. Sarkozy hélt því fram að 35 stunda vinnuvikan sem innleidd var af sósíalistum á sínum tíma hefði haft mjög slæm áhrif á franskan efnahag og hann sagði að Frakkar þyrftu að vinna lengri vinnudag. Sarkozy gagnrýndi ennfremur tillögur Royal í lífeyrissjóðsmálum og sagði hugmyndir hennar óljósar.

Báðir frambjóðendurnir leggja mikið kapp á að fá atkvæði þeirra 18 prósent kjósenda sem kusu „þriðja manninn", Francois Bayrou í fyrri umferð forsetakosninganna, auk þeirra sem kusu hægri mannin Le Pen.

Þetta var í fyrsta skipti síðan 1995 sem forsetaframbjóðendur í seinni umferðinnni mætast í kappræðum í sjónvarpi. Þá mættust þeir Jacques Chirac og Lionel Jospin í kappræðum sem 17 milljónir Frakka fylgdust með.