Vieira: Wenger gæti farið fá Arsenal

Miðjumaðurinn Patrick Vieira hjá Inter Milan og fyrrum fyrirliði Arsenal, segist viss um að Arsene Wenger muni hugsa sig vel um áður en hann samþykki að framlengja samning sinn við félagið eftir að David Dein fór frá félaginu á dögunum.

Dein var maðurinn sem fékk Wenger til Arsenal á sínum tíma og var samstarf þeirra þessi tíu ár mjög gott. Samningur Wenger við Arsenal rennur út á næsta ári.

"Þeir unnu lengi saman og ég sé ekki að Wenger haldi mikið lengur áfram einn. Þetta setur spurningamerki við framtíð hans hjá félaginu í mínum huga. Ég trúði því ekki þegar Dein hætti hjá Arsenal og skil ekki af hverju hann fór svona snögglega. Nú er spurning hvort Wenger heldur áfram eða ekki," sagði Vieira í samtali við The Sun.