Wenger: Við sköpum flest færi allra liða

Arsene Wenger var ekki ánægður með það hvað hans menn í Arsenal fóru illa með færin í dag þegar liðið lagði Fulham 3-1 á heimavelli. Hann segir liðið skulda stuðningsmönnunum að hirða þriðja sætið í deildinni.

Arsenal var betra liðið í leiknum í dag, en þurfti tvö mörk í lokin til að tryggja sér sigur á þrjósku liði Fulham - sem er í bullandi fallbaráttu. "Við sköpum okkur fleiri færi en nokkurt annað lið í ensku úrvalsdeildinni, en þó eru lið þarna úti sem eru að skora meira en við. Það þýðir einfaldlega að við erum að fara mjög illa með færin okkar. Við náðum að sýna úr hverju við erum gerðir í restina eftir slæman kafla og við verðum að ná þriðja sæti deildarinnar. Við skuldum stuðningsmönnunum það og verðum að gefa allt sem við eigum af virðingu við mótherjana," sagði Wenger.