Mourinho: Ég þarf á Crespo að halda

Jose Mourinho, knattspyrnustjóri Chelsea, segist hafa mikinn áhuga á að fá argentínska framherjann Hernan Crespo aftur til félagsins í sumar. Crespo hefur verið á flóknum lánssamningi hjá Ítalíumeisturum Inter og segist yfir sig ánægður að vera kominn aftur til Ítalíu. Hann hefur skorað 10 mörk í deildinni í vetur og hefur lýst því yfir að hann vilji aldrei fara aftur til Englands.

Chelsea á þó enn réttinn á leikmanninum og Mourinho segist þurfa á honum að halda á næsta ári. "Ég skil mannlegu hliðina á máli Crespo, en hann er okkar leikmaður og ég þarf á framherja að halda á næsta ári þar sem ég reikna með því að Didier Drogba og Salomon Kalou verði uppteknir af Afríkukeppninni eftir áramótin. Þá þarf ég á framherja eins og Crespo að halda," sagði Mourinho.