Adebayor var hótað lífláti

Emmanuel Adebayor, framherji Arsenal, er ekki viss um hvort hann hafi hug á að spila fyrir þjóð sína aftur eftir að hafa fengið lífslátshótanir fyrir landsleik Togo og Sierra Leone í Afríkukeppninni í gær. Adebayor segir að sér og fjölskyldu sinni hafi verið hótað hinu versta ef hann hefði ekki spilað leikinn.

Adebayor leiðir hóp leikmanna liðsins sem höfðu hótað að spila ekki aftur fyrir landsleikinn ef þeir fengju ekki ákveðin bónus sem þeir áttu að fá fyrir að hafa komist í lokakeppni HM í Þýskalandi síðasta sumar. Leikmenn hafa ekki fengið greitt fyrir þann árangur og kveðst Adebayor einfaldlega hafa verið að berjast fyrir rétti leikmanna með því að vilja ekki spila.

"En einhverjum virðist hafa mislíkað þessar aðgerðir leikmanna. Ég fékk símtöl þar sem mér var sagt að spila eða annars fengi fjölskylda mín að kenna á því," segir Adebayor.

"Nú fer ég aftur til Arsenal þar sem ég mun hugsa vandlega um framtíð mína með landsliðinu. Mitt líf og mitt fjölskylda skiptir meira máli en landsliðið," bætti Adebayor við en hann skoraði tvö af mörkum Togo í leiknum.