Corradi: Manchester City er martröð

Ítalski sóknarmaðurinn Bernardo Corradi fer ekki fögrum orðum um stjóra sinn Stuart Pearce í enskum fjölmiðlum í morgun og lýsir sínu fyrsta tímabili á Englandi sem "lifandi martröð". Corradi kom til Manchester City frá Valencia síðasta sumar og hefur átt erfitt uppdráttar í ensku deildinni. Hann segir Pearce skorta tekníska þekkingu til að ná árangri.

Corradi hefur aðeins skorað þrjú mörk í 23 leikjum síðan hann kom til Man. City og kennir hann lélegu skipulagi Pearce að miklu leyti um þann árangur.

"Hann er týpískur Englendingur," sagði Corradi um Pearce. "Hann býst við því að þú farir út á völlinn og leggir andstæðingana af velli án þess að vita nokkuð um hvernig þeir spila. Það er enginn undirbúningur hjá honum. Þetta hefur verið martröð líkast," segir Corradi, sem notaði einnig tækifærið og gagnrýndi fyrirliða sinn Richard Dunne.

"Þegar ég vaknaði um morguninn þann dag sem við áttum að spila í 8-liða úrslitum bikarkeppninnar las ég að Dunne væri að gagnrýna alla erlendu leikmennina hjá liðinu. Svona er þetta, það er engin samstaða hér," sagði Corradi.

Fastlega er búist við því að þessi ummæli hans marki svanasöng hans hjá félaginu.