Terry vill meiri samheldni

John Terry, fyrirliði enska landsliðsins í knattspyrnu, segir að leikmenn liðsins verði að spila fyrir þjóð sína á sama hátt og þeir spili fyrir félagslið sín. Enska liðið hefur ekki verið upp á sitt besta í síðustu leikjum sínum en það mætir Ísrael í gríðarlega mikilvægum leik í undankeppni EM í dag.

"Við þurfum að innleiða sömu hugsun hjá landsliðinu og er hjá félagsliðunum, skapa góða liðsheild og vinna bug á þeim vandamálum sem við erum að glíma við," sagði Terry við enska fjölmiðla í morgun. Fyrirliðinn vill meina að samheldnin sé ekki til staðar og að leikmenn vinni ekki nægilega vel fyrir hvorn annan.

"En það er samt engin afsökun. Allir vita hvert hlutverk þeirra í liðinu er og eiga að geta sinnt því af hendi með sóma. Allt annað en sigur í dag er óviðunandi," sagði Terry, en Englendingar eru í þriðja sæti E-riðils undankeppninnar.