Benítez fer hvergi

Bandaríkjamennirnir Gillett og Hicks sem keyptu Liverpool á dögunum sáu ástæðu til þess að gefa út yfirlýsingu um knattspyrnustjórann Rafa Benitez. Benitez er eftirsóttur og forystumenn Real Madríd sagðir ólmir vilja fá hann til þess að stýra Madrídarskútunni.

Enskir fjölmiðlar hafa eftir þeim Hicks og Gillett í morgun að Benitez fari hvergi frá bítlaborginni. Eftir næsta leik Liverpool í lok þessa mánaðar ætla eigendur Liverpool að setjast niður með Benitez og ræða við hann um framtíðarsýn félagsins. Um næstu helgi taka þeir félagar formlega við sem eigendur Liverpool.