Eldur í norskri ferju í morgun

Eldur kom upp í ferjunni Peter Wessel í morgun en hún siglir á milli Larvíkur í Noregi og Hirsthals í Danmörku. Eftir því sem segir á vef Jótlandspóstins kviknaði í rafmagnstöflu í vélarrúmi ferjunnar rétt fyrir sjö að dönskum tíma en við það varð rafmagsnlaust í káetum hennar.

Var öllum farþegum, hátt í 350 manns, safnað saman á veitingastað ferjunnar og þá var skip á vegum dönsku landhelgisgæslunnar sent á vettvang ef bjarga þyrfti farþegunum af ferjunni. Hins vegar tókst að koma í veg fyrir að eldurinn breiddist út frá vélarrúminu og lauk slökkvistarfi um klukkan níu að dönskum tíma. Verið er að kanna hvort skipið geti siglt fyriri eigin vélarafli til Frederikshavn í Danmörku eða hvort kalla þurfi til dráttarbát.