Segja Guantanamo-réttarhöld ósmekklega sýndarmennsku

Mannréttindasamtökin Amnesty International segja herréttarhöld sem hefjast nú á mánudag yfir föngum í Guantanamo-búðunum á Kúbu ekki vera annað en ósmekklega sýndarmennsku.

Talið er að um 370 mönnum sé haldið föngnum af Bandaríkjamönnum í Guantanamo-búðunum á Kúbu, öllum er þeim haldið án þess að nokkurn tíman hafi verið réttað yfir þeim og ásakanir mannréttindasamtaka um pyntingar hafa verið háværar. Amnesty segir réttarhöldin sem hefjast eiga á mánudaginn skrumskælingu á réttlætinu og krefjast þess að fangarnir verði fluttir til Bandaríkjanna og réttað yfir þeim í almennum dómstólum.

Herrétturinn í Guantanamo hefur víðtækar heimildir til að dæma menn til dauða eða í lífstíðarfangelsi. Takmarkaðar leiðir eru til að áfrýja dómum herréttarins. í Hvíta húsinu segja menn að nauðsynlegt sé að halda mönnum föngnum í Guantanamo og rétta yfir þeim þar og að það sé hluti af stríðinu við hryðjuverk. Þeir fangar sem lengst hafa setið í fangelsinu í Guantanamo hafa verið þar nú í um sex ár án þess að réttað hafi verið yfir þeim.