Ronaldo: Ég er enginn Galactico

Portúgalinn Cristiano Ronaldo hjá Manchester United vill ekki láta tengja sig við Real Madrid á Spáni og segist ekki vera neinn Galactico - en það er orð sem spænskir nota yfir stórstjörnur liðsins. Ronaldo virðist ætla að einbeita sér algjörlega að því að spila með enska liðinu þrátt fyrir þrálátan orðróm um að hann sé á leið til Spánar.

"Ég er enginn Galactico og vil láta líta á mig sem leikmann United sem leggur sig allan fram og vinnur fyrir liðið. Hérna gengur mér vel og ég vil vera áfram hjá Manchester United - í meira en tvö ár í viðbót," sagði Portúgalinn leikni.