Ronaldo fór á kostum í stórsigri United

Manchester United stefnir nú hraðbyri á að tryggja sér sigur í ensku úrvalsdeildinni, en í dag vann liðið sannfærandi 4-1 sigur á Bolton á Old Trafford. Ji-Sung Park og Wayne Rooney skoruðu tvö mörk hvor og Christiano Ronaldo lagði upp þrjú þeirra, en Gary Speed minnkaði muninn fyrir Bolton.

United varð fyrir áfalli eftir aðeins 9 mínútur í dag þegar Gary Neville þurfti að fara af velli meiddur á ökkla. Það kom hinsvegar ekki í veg fyrir að Park skoraði fyrsta mark liðsins eftir 14 mínútur og Rooney kom liðinu í 2-0 aðeins þremur mínútum síðar með 50. marki sínu fyrir félagið. Christiano Ronaldo fór á kostum í liði United og lagði upp þriðja mark sitt fyrir hálfleikinn með því að búa til annað mark fyrir Park. Wayne Rooney gerði svo út um leikinn í síðari hálfleik og Gary Speed lagaði stöðuna eilítið með marki úr víti á lokamínútunum.

United hefur nú níu stiga forskot á toppnum á ný, en Chelsea á leik til góða gegn Sheffield United síðar í dag. Manchester United hefur nú 75 stig á toppnum, en Bolton er í fimmta sæti með 47 stig.