Segir flensuna ekki komna frá Ungverjalandi

Fuglaflensusmitið sem upp kom á kalkúnabúi Bernard Matthews í Suffolk á Englandi í síðustu viku er ekki komið frá Ungverjalandi. Þetta fullyrðir Andreas Dekany talsmaður landbúnaðarráðuneytisins í Ungverjalandi.

Bresk stjórnvöld rannsaka nú hvernig smitið barst til Suffolk og hefur kenningin um að það hafi komið frá gæsabúi Bernard Matthews í Ungverjalandi, þar sem fuglaflensa greindist í janúar, verið lífseig.

Bernard Matthews neitaði upphaflega að það væri mögulegt að smitið hefði komið frá Ungverjalandi en viðrkenndi svo að afurðir hefðu verið fluttar frá Ungverjalandi til Suffolk.