Flóðin í Indónesíu í rénun

Flóðin í Indónesíu eru nú í rénun og þúsundir íbúa höfuðborgarinnar Jakarta hafa snúið aftur til síns heima. Um 300 þúsund íbúar Jakarta neyddust til að yfirgefa heimili sín vegna flóðanna og að minnsta kosti 50 dóu.

Yfirvöldum bíður nú ærið verkefni að hreinsa í borginni eftir flóðin enda göturnar útataðar í illa þefjandi rusli og öðrum úrgangi. Enn hafa stjórnvöld áhyggjur af mengun í vatnsbólum borgarinnar og tilheyrandi farsóttum. Um fimmtán tonn af lyfjum hafa verið send til borgarinnar til að hamla útbreiðslu þeirra. Efnahagslegar afleiðingar flóðanna eru gríðarlegar, enda fóru rafmagnslínur víða í sundur og fjarskiptalagnir eyðilögðust. Talið er að kostnaðurinn sé hið minnsta um 30 milljarðar króna.