Átök þrátt fyrir yfirlýst vopnahlé

Til átaka hefur komið milli stuðningsmanna Fatah-hreyfingarinnar og Hamas-liða á Gasaströndinni í dag þrátt fyrir yfirlýst vopnahlé. Tólf særðust snemma í morgun átökum og þá sökuðu Fatah-liðar Hamas um að hafa rænt 40 öryggisvörðum á eftirlitsstöðvum á Gasa.

Þá réðust byssumenn á vegum Fatah inn í landbúnaðarráðuneytið og höfðu á brott með sér tölvur og ýmis gögn en Hamas-liðar halda um stjórnartaumana í landinu eftir að þeir sigruðu í þingkosningum í fyrra. Þá mun einnig hafa komið til átaka við tvö önnur ráðuneyti og við háskóla á Gasaströndinni.

Vopnahléi var lýst yfir í gær eftir að á þriðja tug manna hafði látist og 200 særst á einum sólarhring í átökum fylkinganna. Þetta var annað vopnahléð sem fylkingarnar gerðu á innan við viku en svo virðist sem það sé einungis orðin tóm.

Yfir hundrað manns hafa látist í átökum Fatah og Hamas frá því að Hamas-liðar komust til valda í fyrra. Mahmoud Abbas, forseti Palestínu og leiðtogi Fatah-hreyfingarinnar, og Khaled Mashaal, leiðtogi Hamas, hittast á þriðjudaginn kemur í Sádi-Arabíu og ræða myndun þjóðstjórnar á heimastjórnarsvæðum Palestínumanna.