Mikið landbrot á dönsku eynni Anholt

Töluvert landbrot varð á eynni Anholt í Kattegat sem tilheyrir Danmörku í óveðri sem gekk yfir Suður-Svíþjóð og Danmörku um helgina.

Tré og þök rifnuðu upp í storminum um helgina og þá var lokað fyrir umferð um bæði Stóra-Beltisbrúna og Eyrarsundsbrúna í gær vegna veðurhamsins. Þá segir frá því á vef Jótlandspóstins að stormurinn hafi bitið stóran bita af norðvesturströnd eyjarinnar Anholt. Haft er eftir formanni íbúasamtaka á eynni að margir metrar hafi horfið af ströndinni og nú séu aðeins um tíu metrar frá sjónum að aðalsamgönguæð eyjarinnar. Óttast íbúarnir að frekara óveður höggvi skarð í veginn síðar meir.