Farþegaflugvél enn ófundin í Indónesíu

Enn hefur hvorki fundist tangur né tetur af indónesísku farþegaflugvélinni sem saknað hefur verið frá því á nýársdag. Í morgun var greint frá því að ekkert neyðarkall hefði borist frá vélinni og engar vísbendingar væru um að vélarbilun hefði orðið.

Veður var hins vegar afar slæmt á leiðinni og er því talið að hún hafi farist af þeim sökum. Flaksins hefur verið leitað árangurslaust af hafi, jörðu og úr lofti á um sjötíu þúsund ferkílómetra stóru svæði, litlu smærra en Ísland. 102 farþegar voru um borð í þotunni sem var á leið á milli indónesísku eyjanna Jövu og Sulawesi.