United hefur ekki nýtt sér erfiðleika okkar

Jose Mourinho, stjóri Chelsea, segir að Manchester United hafi misst af gullnu tækifæri til að stinga af í deildinni yfir hátíðarnar eftir að Chelsea missteig sig og hefur nú gert þrjú jafntefli í röð. Hann segist mjög sáttur við að forskot þeirra rauðu sé aðeins sex stig á toppnum.

"Ef tekið er mið af erfiðleikum okkar undanfarið ætti Manchester United með öllu að hafa 10, 12 eða 14 stiga forskot á okkur. Ég er mjög sáttur við að það er ekki meira en 6 stig. Mín skoðun er sú að United hafi mistekist að koma sér í mjög vænlega stöðu í deildinni á meðan við áttum í erfiðleikum. United hefur tapað 5 stigum gegn West Ham og Newcastle og við hlökkum mikið til síðari helmings leiktíðar þar sem við fáum vonandi eitthvað af leikmönnum okkar til baka úr meiðslum," sagði Mourinho.