Óttast annan kjarnorkuleka eftir jarðskjálfta

Níu manns létust í jarðskjálftunum í norðvesturhluta Japan í gær og um þúsund slösuðust. Japanskir embættismenn rannsaka nú annan leka úr kjarnorkuveri. Björgunaraðgerðir standa enn yfir og eyðilegging í borginni Kashiwazaki er gífurleg. Að minnsta kosti 12 þúsund manns dvöldu í neyðarskýlum.

Eldur kviknaði í kjarnorkuverinu Kashiwazaki-Kariwa við fyrsta skjálftann í gær sem var 6,8 á Richter. Hann átti upptök við Niigata hérað í norðvesturhluta Japan. Kjarnorkuverið er það stærsta í heimi. Það tilkynnti eftir skjálftann að auk eldsins hefði geislavirkt vatn lekið í sjóinn. Embættismenn fullyrða að það muni ekki valda umhverfisspjöllum. Í morgun kom í ljós að 100 tunnur með geislavirkum úrgangi féllu um koll í skjálftunum og einhverjar opnuðust. Verið er að kanna hvort umhverfisspjöll hafi orðið af þeim völdum.

Nokkuð hefur verið rætt um öryggi kjarnorkuvera í Japan í jarðskjálftum, en margir óttast að þau séu ekki nægilega trygg í stórum skjálftum.

Vegir og brýr skemmdust og aurskriður lokuðu vegum. Rúmlega 300 heimili gjöreyðilögðust í hafnarborginni Kashiwazakii, þar sem stór svæði eru enn án vatns og rafmagns.

Níu létust í skjálftunum í gær og meira en þúsund slösuðust. Enn er leitað að fólki í rústunum en gífurlegar skemmdir hafa orðið víða í borginni.

Óljóst er hvenær fólk getur snúið aftur til síns heima en fjölmargir eldri borgara eru á meðal þeirra sem dvelja í neyðarskýlum.

Minni eftirskjálftar halda áfram, en spáð er rigningu á svæðinu næstu daga og er óttast að hún valdi frekari skriðuföllum og auki þannig á slæmt ástand á svæðinu.

Nikkei hlutabréfavísistalan lækkaði mikið í morgun vegna óvissu um afkomu tryggingafélaga í Japan sem þurfa að borga út milljarða króna vegna skemmda í jarðskjálftanum.