Rússar bregðast hart við

Rússnesk stjórnvöld hóta því að grípa til harðra aðgerða gegn Bretlandi í kjölfar þess að bresk stjórnvöld ákváðu að reka fjóra rússneska stjórnarerindreka úr landi.

Bretar höfðu sagst gera þetta vegna þess að Rússar hefðu ekki orðið við óskum Breta um að framselja Andrei Lugovoi, rússneskan kaupsýslumann og fyrrverandi njósnara, sem er grunaður um að hafa byrlað Alexander Litvinenko geislavirkt eiturefni í nóvember síðastliðnum.

„Þeir ættu að skilja það vel í London að þessum ögrandi aðgerðum, sem runnar eru undan rifjum breskra ráðamanna, verður ekki látið ósvarað og þær munu óhjákvæmilega hafa í för með sér háalvarlegar afleiðingar fyrir samskipti Rússa og Breta,“ sagði Mikhaíl Kaminín, talsmaður rússneska utanríkisráðuneytisins, í gær.

Hann bætti því við að Sergei Lavrov utanríkisráðherra hafi fært David Miliband, utanríkisráðherra Breta, sömu skilaboð í símtali fáeinum klukkustundum fyrr.

Kaminín sagði þessa ákvörðun Breta vera „vel skipulagðar aðgerðir til þess að nýta Litvinenko-málið í pólitískum tilgangi.“ Kaminín sagði þó ekkert um það hver viðbrögð Rússa yrðu.