Tottenham kaupir Boateng frá Hertha Berlin

Tottenham hefur tryggt sér hinn tvítuga Þjóðverja Kevin-Prince Boateng frá Hertha Berlin. Tottenham hefur verið á eftir leikmanninum í nokkurn tíma en hafa nú haft betur í kapphlaupi við önnur lið. Boateng er af mörgum talinn einn besti ungi miðjumaðurinn í Evrópu. Kaupverðið er talið vera um 5,4 milljónir punda.

„Það er frábært að koma til Englands," sagði Boateng við heimasíðu Tottenham. „Að vera í London og spila fyrir Tottenham verður frábært. Það hefur verið takmark mitt að spila á Englandi, ég er 20 ára núna og draumur minn er að rætast. Ég veit að Tottenham spilar sóknarbolta og hefur metnað til að verða betra lið og ég vil vera partur af því."

Boateng er sterkur, framliggjandi miðjumaður og er einn efnilegasti leikmaður Þýskalands. Martin Jol, framkvæmdastjóri Tottenham líkir leikmanninum við tvo efnilegustu leikmenn sína, þá Aaron Lennon og Tom Huddlestone.